Meri Maa (Meri Jannaton Ka Nishan) Lyrics

محبت کا اک آسماں میری ماں

مری جنتوں کا نشاں میری ماں

وہ ریشم سا لہجہ وہ میٹھی زباں

وہ چاہت کا اک جذبہ ِبیکراں

میرا درد جس کی نظر میں سدا

مجسم رہا صورت ِزخم ِجاں

مگر اپنی تکلیف کے واسطے

کبھی نہ ہوئے اس کے آنسو رواں

میرے واسطے موم ہے مامتا

صبر کی ہے لیکن چٹاں میری ماں

مری ہر خطا پر تھا اک درگزر

وہ تلقین اور حوصلہ سربسر

ہر اک میری ٹھوکر پہ میرے لیے

سہارا تھی ان انگلیوں کی پکڑ

یہ دنیا کی تپتی ہوئی ریت پر

میں بھٹکا مسافر وہ تنہا شجر

میں تاریک راہ پر چلا تو لگا

دعاؤں کی ہے کہکشاں میری ماں

مجھے روشنی کا سبق جب دیا

اندھیروں میں پھر نہ بھٹکنے دیا

زمانے کی تپتی ہر اک دھوپ سے

مجھ کو واقف کیا پر نہ جلنے دیا

مجھے دوڑنا اس نے سکھلا دیا

ہر اک چوٹ پر حوصلہ بھی دیا

میری زندگی کی ہر اک راہ پر

ہر اک موڑ پر ضوفشاں میری ماں

میری عظمتوں کی وہ معمار ہے

قوی جسم اور سوچ بیدار ہے

مری نصرتوں کی جو رفتار ہے

اسی کی محبت کا اظہار ہے

ہر اک خشک موسم کا دیکھو ذرا

ہر اک وار اب کیسے بیکار ہے

کبھی بھی وہ میرے گلستان پر

نہ آنے دے رنگ ِ خزاں میری ماں

وہ جس نے مجھے سبق اول دیا

اور معبود ِبر حق سے واقف کیا

وہ دین ِمحمد کا اک اک سبق

مجھے کتنی چاہت سے اس نے دیا

ہمیشہ کی قربت کی خواہش لیے

مجھے جس نے خود سے جدا بھی کیا

مری ذات کے گنبدوں میں رہی

ہمیشہ ہی مثل ِاذاں میری ماں