Aye Rahiye Rah e Rushd o Huda, Abdul Hadi S.M Lyrics

اے راہیِ راہِ رشد و ہدی اے مطلعِ نور و خلقِ حسن

اے پیکرِ خیر و صدق و صفا اے رشکِ رسولاں فخرِ زمن

اے راہیِ راہِ رشد و ہدی اے مطلعِ نور و خلقِ حسن

ہر سمت ہویدا تھی ظلمت تھی بزم جہاں میں ویرانی

باطل کے عساکر کے آگے مغلوب تھی نوعِ انسانی

اے راہیِ راہِ رشد و ہدی اے مطلعِ نور و خلقِ حسن

قدموں نے تمہارے عالم میں چمکا دی مہرِ حق کی کرن

توحید کے نعروں سے گونجے کیا دیر و حرم کیا کوہ و دمن

اے راہیِ راہِ رشد و ہدی اے مطلعِ نور و خلقِ حسن

چھٹنے لگا ابرِ ظلم و ستم انصاف کے بادل منڈلائے

بھٹکے ہوئے رہرو کو تم نے آثارِ ہدایت دکھلائے

اے راہیِ راہِ رشد و ہدی اے مطلعِ نور و خلقِ حسن

تہذیب سے عاری دنیا کو دستور حیات افروز دیا

آئینِ شریعت سمجھایا پیغامِ وفا ہر روز دیا

اے راہیِ راہِ رشد و ہدی اے مطلعِ نور و خلقِ حسن

انسان کو انساں تم نے کیا ہر فرد کا بیڑا پار کیا

آوارۂ دشتِ امکاں کے ہر گوشے کو گلزار کیا

اے راہیِ راہِ رشد و ہدی اے مطلعِ نور و خلقِ حسن

تم اسوۂ آدمِ خاکی ہو ، اوصاف سراپا رحم و کرم

معمارِ جہاں ، غمخوارِ امم ، تم شاہِ عرب تم شاہِ عجم

اے راہیِ راہِ رشد و ہدی اے مطلعِ نور و خلقِ حسن

اے منزلِ سدرہ کے مہماں معراج کی زینت تم سے تھی

تشبیہ تمہاری میرے نبی خورشید و مہ و انجم سے تھی

اے راہیِ راہِ رشد و ہدی اے مطلعِ نور و خلقِ حسن

تم سے ہی سلیقہ جینے کا تم زیست کا مقصد اور منشا

جو راہِ فنا کا ساؔلک ہے تم حشر میں اس کے ہو ملجا

اے راہیِ راہِ رشد و ہدی اے مطلعِ نور و خلقِ حسن